Chaidh taghadh eile a chumail airson Pàrlamaid na h-Alba an-dè!
B’ e seo taghadh an Oifigeir Riaghlaidh (presiding officer) agus nan Leas-oifigearan Riaghlaidh.
Anns a’ chiad seisean den Phàrlamaid (1999-2003) bha Dàibhidh Steel againn mar Oifigear Riaghlaidh, san dàrna seisean (2003-7) bha Seòras Reid againn agus san treas seisean (2007-11) bha Ailig MacFhearghais againn.
An-dè chaidh an ceathramh Oifigear Riaghlaidh a thaghadh, ’s i Tricia Marwick BPA, ball airson Fìobh Mheadhanach agus Gleann Rathais. Feumaidh an t-Oifigear Riaghlaidh a bhith neo-phàirteach anns an dreuchd – cha bhi i a’ gabhail pàirt ann am poileataigs pàrtaidh idir.
Còmhla rithe tha an dà Leas-oifigear Riaghlaidh a chaidh a thaghadh an-dè cuideachd, ’s iad Elaine Nic a’ Ghobhainn BPA (Pàrtaidh Làbarach na h-Alba, Coatbridge agus Chryston) agus Iain Scott BPA (Pàrtaidh Tòraidheach na h-Alba, Inbhir Air). Feumaidh an dà Leas-oifigear Riaghlaidh a bhith neo-phàirteil cuideachd nuair a tha iad anns a’ chathair aig coinneamhan pàrlamaideach; ach nuair nach eil, faodaidh iad làn-phàirt a ghabhail ann an gnothaichean na Pàrlamaid.
Tha obair mhòr aig an Oifigear Riaghlaidh agus aig an dà Oifigear Riaghlaidh:
- Coinneamhan den Phàrlamaid a stiùireadh
- Coinneamhan de Bhiùro na Pàrlamaid is Buidheann Chorporra Pàrlamaid na h-Alba a ghairm is a stiùireadh (mur eil fhios agad dà a th’ anns na buidhnean seo, na gabh dragh oir bheir am blog seo sùil orra ann an ùine nach bi fada)
- Co-dhùnadh air ceist sam bith a thaobh riaghailtean obrach na Pàrlamaid.
- A bhith a’ riochdachadh na Pàrlamaid an dà chuid aig baile agus thall thairis.
Leugh fios naidheachd mun Oifigear Riaghlaidh ùr
Leugh fios naidheachd mu na Leas-oifigearan Riaghlaidh ùr
Leugh an Aithisg Oifigeil mu thaghadh an Oifigear Riaghlaidh agus nan Leas-oifigearan Riaghlaidh.
Alasdair